मकवानपुर थाहा नगरपालिका वडा नम्बर ६ को बज्रवाराही माविमा ११ कोठे विद्यालय निर्माण हुने भएको छ । आपतकालिन विद्यालय पुर्ननिर्माण आयोजना अन्तर्गत जाइकाको सहयोगमा भवन निर्माण हुने भएको हो । विद्यालय भवनको थाहा नगरपालिकाका प्रमुख लवशेर विष्टले १८ चैत्रमा एक समारोहकाबीच शिलान्यास गरे ।
३ करोड १० लाख ८७ हजार १८७ रुपियाँ लागत अनुमान गरिएको ११ कोठे भवन सुबिधा सम्पन्न भवन निर्माणको ठेक्का शर्मा ए.एम.जेभि काठमाडौले पाएको छ ।विद्यालय भवन वि.सं. २०७९ श्रावण महिनाभित्र सम्पन्न गर्नुपर्नेछ । राष्ट्रिय पुर्ननिर्माण जिल्ला आयोजना कार्यन्वयन ईकाई (शिक्षा) मकवानपुरका प्रमुख बद्री बहादुर पाठकको विशेष आतिथ्यतामा भएको कार्यक्रमका अतिथि तथा सहभागीहरुलाई विद्यालयका प्रधानाध्यापक रमेश मान डंगोलले स्वागत गरेका थिए ।
शिक्षक निराजन गोपालीको संचालनमा भएको कार्यक्रममा थाहा नगरपालिका वडा नम्बर ६ का वडा अध्यक्ष शशिधर सुवेदी जिल्ला आयोजना कार्यान्वयन इकाई शिक्षा मकवानपुर का प्रमुख बद्री बहादुर पाठक र नगर प्रमुख लवशेर बिष्टले मन्तब्य व्यक्त गरेका थिए । विद्यालय व्यवस्थापन समितिका अध्यक्ष ईश्वर लाल रुम्बाको सभाध्यक्षतामा भएको उक्त कार्यक्रममा विभिन्न संघ संस्थाहरुका प्रमुखहरु, अभिभावकहरुको उपस्थिति रहेको थियो ।
यो नेपाली भाषाको अनलाइन पत्रिका हो । हामी तपाईमाझ खासगरी मकवानपुरकाे थाहा नगरपालिका र सँगसँगै तपाईंलाई काम लाग्ने देश-विदेशका समाचार, भिडियो, अडियो र विचार प्रकाशन गर्छौं । सुझाव, समाचार र विज्ञापनका लागि सम्पर्क : ९८५५०७८९१०(सम्पादक)
