नेपाल सरकारको कोराना विरुद्धको खोप अभियानअन्तर्गत २७ जेठमा थाहा नगरपालिकामा ७६ जनाले खोप लगाएका छन् । २७ जेठमा प्राथामिक स्वास्थ्य केन्द्र पालुङ, आग्रा स्वास्थ्य चौकी र देउखेल सहरी स्वास्थ्य केन्द्रगरी तीनवटा खोप केन्द्रमा ६२ देखि ६४ वर्ष उमेरका नागरिकहरुलाई खोप लगाइएको हो ।
प्राथमिक स्वास्थ्य केन्द्र पालुङ खोप केन्द्रमा १८ पुरुष र ९ महिला गरी २७ जना, आग्रा स्वास्थ्य चौकी खोप केन्द्रमा १२ पुरुष र १३ महिला गरी २५ जना र देउखेल सहरी स्वास्थ्य केन्द्र खोप केन्द्रमा १२/१२ गरी २४ जनाले कोरोनाविरुद्धको खोप लगाएको थाहा नगरपालिका स्वास्थ्य शाखा प्रमुख मेघराज बलामीले जानकारी दिए । २७ जेठमा खोप लगाउनेमा ४२ पुरुष र ३४ महिला रहेका छन् ।
योसँगै थाहा नगरपालिकामा २६ र २७ जेठमा गरी कूल २७२ जनाले भेरोसिल खोप लगाएका छन् । २६ जेठमा १ सय ४ महिला र ९२ जना गरी १९६ जनाले खोप लगाएका थिए ।
दुई दिनको खोप अभियान सकिएपछि थाहा नगरपालिकाका स्वास्थ्य शाखा प्रमुख बलामीले थाहा टाइम्ससँग कुरा गर्दै लक्षित गरिएका मध्ये निकै कम नागरिकहरु खोप लगाउन आएको बताए ।
११ जनामा कोरोना पुष्टि
आग्राको स्वास्थ्य चौकी र सहरी स्वास्थ्य केन्द्रमा भेरोसिल खोपसँगै कोरोना परीक्षण पनि गरिएको थियो । एन्टिजेन परीक्षण गर्दा दुबै स्वास्थ्य संस्थामा गरी ११ जनामा कोरोना पुष्टि भएको छ ।
देउखेल सहरी स्वास्थ्य केन्द्रमा ४५ जनामा परीक्षण गर्दा ९ जनामा र आग्रा स्वास्थ्य चौकीमा ३१ जनामा परीक्षण गर्दा २ जनामा कोरोना देखिएको स्वास्थ्य शाखा प्रमुख बलामीले जानकारी दिए ।
यो नेपाली भाषाको अनलाइन पत्रिका हो । हामी तपाईमाझ खासगरी मकवानपुरकाे थाहा नगरपालिका र सँगसँगै तपाईंलाई काम लाग्ने देश-विदेशका समाचार, भिडियो, अडियो र विचार प्रकाशन गर्छौं । सुझाव, समाचार र विज्ञापनका लागि सम्पर्क : ९८५५०७८९१०(सम्पादक)
