जिल्ला प्रशासन कार्यालय मकवानपुरले सभा, सम्मेलन, मेला, महोत्सव, सप्ताह तथा अन्य कुनैपनि सार्वजनिक कार्यक्रम नगर्न निर्देशन दिएको छ । विश्वका ८० भन्दा बढी मुलुकमा फैलिएको कोरोना भाइरसको प्रभावलाई मध्यनजर गर्दै यस्तो निर्देशन दिइएको जनाएको छ ।
२२ फागुनमा हेटौंडामा बसेको सर्वपक्षीय बैठकले अर्को सूचना जारी नभएसम्मको लागि सभा, सम्मेलन, मेला, महोत्सवलगायतका मान्छेको भीड हुने कुनै गतिविधि नगर्न निर्देशन दिएको हो । बैठकले जिल्लाबासीलाई कोरोना भाइरसको संक्रमणबाट बच्न सावधानी अपनाउन अनुरोध गरेको छ ।
बैठकमा बागमती प्रदेशको प्रदेशसभा सदस्य मुनु सिग्देल, जिल्ला समन्वय समितिका प्रमुख रघुनाथ खुलाल, प्रमुख जिल्ला अधिकारी नारायण प्रसाद भट्ट, विभिन्न राजनैतिक दलका प्रतिनिधी, सञ्चारकर्मी र स्वास्थ्य क्षेत्रका प्रतिनिधीहरुको सहभागिता रहेको थियो ।
