सरकारले शिक्षक सेवा आयोगका पदाधिकारी नियुक्तिको लागि लोक सेवा आयोगका अध्यक्षको अध्यक्षतामा सिफारिस समिति गठन गर्ने निर्णय गरेको छ । गत सोमबार बसेको मन्त्रिपरिषद्को बैठकका निर्णय सार्वजनिक गर्दै सरकारका प्रवक्ता तथा परराष्ट्र मन्त्री प्रदीप ज्ञवालीले शिक्षक सेवा आयोगका अध्यक्ष र सदस्य नियुक्तिको लागि सिफारिस समिति गठन गर्ने निर्णय गरेको जानकारी गराएका हुन् ।
शिक्षक सेवा आयोगको अध्यक्ष र एक महिलासहित अन्य दुई जना सदस्यहरूको नियुक्तिका लागि लोक सेवा आयोगका अध्यक्षको अध्यक्षतामा त्रिभुवन विश्वविद्यालयका उपकुलपति र शिक्षा विज्ञान तथा प्रविधि मन्त्रालयका सचिव सदस्य रहेको तीन सदस्यीय सिफारिस समिति गठन गरिने छ । यसअघि शिक्षक सेवा आयोगको अध्यक्ष र सदस्य पदमा नियुक्तिका लागि सिफारिस गर्न लोक सेवा आयोगका अध्यक्ष उमेशप्रसाद मैनालीको नेतृत्वमा सर्च कमिटी गठन गरिएको थियो। शिक्षा ऐनमा भएको सातौँ संशोधनमा आयोगमा १ अध्यक्ष र २ जना सदस्य(एक महिला) गरी ३ सदस्यीय आयोग गठन हुने प्रावधान छ ।
लोक सेवा आयोगका अध्यक्षको अध्यक्षतामा त्रिभुवन विश्वविद्यालयका उपकुलपति र शिक्षा मन्त्रालयका सचिव सदस्य रहने तीन सदस्यीय समितिको सिफारिसमा नेपाल सरकारले आयोगका पदाधिकारीहरूको नियुक्ति ५ वर्षका लागि गर्ने व्यवस्था शिक्षा ऐनमा छ ।
यो नेपाली भाषाको अनलाइन पत्रिका हो । हामी तपाईमाझ खासगरी मकवानपुरकाे थाहा नगरपालिका र सँगसँगै तपाईंलाई काम लाग्ने देश-विदेशका समाचार र विचार प्रकाशन गर्छौं । सुझाव, समाचार र विज्ञापनका लागि सम्पर्क : ९७०५०७८९१०
