हरेक वर्षको असार १० गतेको गाउँ तथा नगरसभामा आगामी आर्थिक वर्षको बजेट र नीति तथा कार्यक्रम पेस गर्नुपर्ने कानुनी व्यवस्था भएपनि मकवानपुरका तीनवटा स्थानीय तहले बुधबार बजेट सार्वजनिक गरेनन् ।
जिल्लामा रहेका दशवटा स्थानीय तहमध्ये वागमती, कैलाश र इन्द्रसरोवर गाउँपालिकाले बजेट सार्वजनिक नगरेका हुन् ।
वागमती गाउँपालिकाले गाउँसभा नै बोलाएन भने कैलाश र इन्द्रसरोवरले नीति तथा कार्यक्रम मात्रै सभामा प्रस्तुत गरे । वागमती गाउँपालिकाका अध्यक्ष सर्केश घलानले कोरोनाको प्रभावका कारण योजना छनोटमा ढिलाइ भएका कारण तोकिएको समयमा गाउँसभा राख्न नसकिएको र असार २० गतेलाई गाउँसभा बोलाइएको जानकारी दिए ।
कैलाश गाउँपालिकाले नीति तथा कार्यक्रम पेस गरेपनि बजेट भने असार १५ गते मात्रै गाउँसभामा पेस गरिने अध्यक्ष टंक मुक्तानले बताए । कैलाशले अघिल्लो वर्ष पनि नीति तथा कार्यक्रम र बजेट पास गर्न नगसकेपछि रातारात बहुमत प्रक्रियाबाट पास गरेको थियो ।
इन्द्रसरोवर गाउँपालिकाले पनि अर्को गाउँसभाको बैठकमा बेजट पेस गर्ने गरी बुधबार नीति तथा कार्यक्रम मात्रै पेस गरिएको कार्यपालिका सदस्य जमानसिं वाइवाले जनाए ।
कान्तिपुरबाट
यो नेपाली भाषाको अनलाइन पत्रिका हो । हामी तपाईमाझ खासगरी मकवानपुरकाे थाहा नगरपालिका र सँगसँगै तपाईंलाई काम लाग्ने देश-विदेशका समाचार र विचार प्रकाशन गर्छौं । सुझाव, समाचार र विज्ञापनका लागि सम्पर्क : ९७०५०७८९१०
