भारतबाट घर फर्किँदै गरेका थाहा नगरपालिकाका ९ जनालाई हेटौंडाको आइसोलेसनमा राखिएको हाे ।
भारतबाट फर्कदै गरेका उनीहरुलाई नेपालगञ्जमा सुरक्षाकर्मीले रोकेर थाहा नगरपालिकालाई खबर गरे पश्चात नगरपालिकाले उनीहरुलाई नगरपालिकाकै खर्चमा हेटौंडाको आइसोलेसनमा राखेको हो । भारतमा रेल चल्न थालेपछि उनीहरु रेल चढेर नेपाली नाकासम्म आएका थिए । उनीहरुमध्ये अधिकाँश थाहा नगरपालिका आग्राको रहेका छन् ।
हेटौंडास्थित आइसोलेसन कक्षमा अहिले थाहा नगरपालिकाका २० जना रहेका छन् । थाहाको ७ नं. वडाका एक बालकमा कोरोना संक्रमण भेटिएपछि उनको सम्पर्कमा रहेको आफ्नो घर र मावलीपट्टिका ११ जना व्यक्तिलाई पिसिआर परीक्षणका लागि हेटौंडा पठाइएकोमा उनीहरु पनि अहिले आइसोलेसनमै रहेका छन् ।
थाहा नगरपालिकाका स्वास्थ शाखा संयोजक मेघराज बलामीले स्वाब परीक्षण किट उपलब्ध भए आइतबार हेटौंडामा २० जनाको पिसिआर विधिबाट कोरोना परीक्षण हुने बताए । यसअघि थाहा नगरपालिकाका १७ जनाको पिसिआर गरिएकोमा सबैको रिपोर्ट नेगेटिभ आएको थियो ।
यो नेपाली भाषाको अनलाइन पत्रिका हो । हामी तपाईमाझ खासगरी मकवानपुरकाे थाहा नगरपालिका र सँगसँगै तपाईंलाई काम लाग्ने देश-विदेशका समाचार र विचार प्रकाशन गर्छौं । सुझाव, समाचार र विज्ञापनका लागि सम्पर्क : ९७०५०७८९१०
