मकवानपुर प्रहरीले बुधवार साढे १२ बजे २ राउण्ड गोली फायर गरेर गाँजा तस्करलाई पक्राउ गरेको छ । थानाभर्याङमा तस्कर समात्न प्रहरीले २ राउण्ड गोली फायर गर्नु परेको पत्रकार सम्मेलन गरि जानकारी दिएको छ ।
मनहरीबाट हेटौंडातर्फ आउँदै गरेको बीआर ०६ जे ४४५८ नम्बरको भारतीय कारलाई नियन्त्रणमा लिन गोली फायर गर्नु परेको मकवानपुर प्रहरी प्रमुख प्रहरी उपरीक्षक सुशील सिंह राठौरले जानकारी दिए ।
वडा प्रहरी कार्यालय हेटौंडाका प्रहरी निरीक्षक इश्वरी प्रसाद भण्डारी नेतृत्वको प्रहरी टोलीले जाँच गर्न खोज्दा कार थानाभर्याङबाट भैरवडाँडातर्फ भाग्ने क्रममा प्रहरीले १ राउण्ड हवाइ फायर गर्यो तर हवाइ फायर गर्दा समेत कार नरोकेपछि पुनः अर्को राउण्ड गोली कारको चक्कामा हानेर नियन्त्रणमा लिएको प्रहरी प्रमुख राठौरले बताए ।
कार जाँच गर्दा सिटमुनी फल्स बटम बनाई १६ वटा पोकामा ३२ किलो लागूऔषध गाँजा फेला परेको प्रहरीले जनाएको छ ।
प्रहरीले भारत मुजफपुर घर भएका कार चालक ३५ वर्षीय संजित पासवान, कारमा सवार सोही स्थानका ३५ वर्षीय अजैमल हवारी र ४५ वर्षीया जाहेर खातुनलाई पक्राउ गरेको छ ।
यो नेपाली भाषाको अनलाइन पत्रिका हो । हामी तपाईमाझ खासगरी मकवानपुरकाे थाहा नगरपालिका र सँगसँगै तपाईंलाई काम लाग्ने देश-विदेशका समाचार र विचार प्रकाशन गर्छौं । सुझाव, समाचार र विज्ञापनका लागि सम्पर्क : ९७०५०७८९१०
