प्रदेश ३ सरकारले ल्याएको आर्थिक वर्ष २०७५/७६ को बजेट पारित भएको छ । अस्थायी मुकाम हेटौंडामा २१ असारमा बसेको प्रदेशसभा बैठकले प्रदेश सरकारले ल्याएको आर्थिक वर्ष २०७५/७६ को बजेट पारित गरेको हो ।
प्रदेशको आर्थिक विधेयक र कर तथा गैरकर राजस्व लगाउने र उठाउने सम्बन्धमा व्यवस्था गर्न बनेको विधेयक पारित भएसंगै प्रदेशको बजेट पारित भएको हो । गत मंगलबार विनियोजन विधेयक र सोसंग सम्बन्धित योजना तथा कार्यक्रमहरुको विवरण पारित भएको थियो । योसंगै प्रदेश सरकारलाई साउन १ गतेदेखि खर्च गर्न र राजस्व संकलन गर्न बाटो खुलेको छ ।
प्रदेश सरकारले आर्थिक वर्ष २०७५/७६ को लागि ३५ अर्ब ६१ करोड ५६ लाख बराबरको बजेट ल्याएको थियो । २१ असारको बैठकमा विशेष समय लिएर बोल्दै प्रमुख विपक्षी कांग्रेसका नेता इन्द्रबहादुर बानिँयाले अघिल्लो सरकारले नियुक्त गरेका प्रदेश प्रमुख परिवर्तन गर्ने निर्णय हुन लागेको भन्दै निर्णय फिर्ता लिन माग गर्नुभयो । उहाँले अनशनरत डा। गोविन्द केसी र गंगामाया अधिकारीको जीवन रक्षाको समेत सरकार समक्ष माग गर्नुभयो ।
यो नेपाली भाषाको अनलाइन पत्रिका हो । हामी तपाईमाझ खासगरी मकवानपुरकाे थाहा नगरपालिका र सँगसँगै तपाईंलाई काम लाग्ने देश-विदेशका समाचार र विचार प्रकाशन गर्छौं । सुझाव, समाचार र विज्ञापनका लागि सम्पर्क : ९७०५०७८९१०
