कोरोना भाइरस संक्रमणका कारण हेटौँडा औद्योगिक क्षेत्रभित्रका उद्योगहरूबन्द हुँदा दैनिक करिब ३० करोड क्षति भइरहेको छ । उद्योग संघ मकवानपुरका अध्यक्ष लेखराज पोखरेलका अनुसार औद्योगिक क्षेत्रभित्रका उद्योगहरूकोदैनिक करिब ३० करोड रुपैयाँ क्षति भएको छ । औद्योगिक क्षेत्रभित्रका १ सय ११ मध्ये हाल २ वटा उद्योग एक सिफ्ट मात्र चल्दै छन् ।
बाँकी १ सय ९ उद्योग बन्द हुँदा ती उद्योगहरूले दैनिक मुनाफा गर्ने करिब ३० करोड रकम नोक्सान व्यहोर्नुपरेको उद्योग संघका अध्यक्ष पोखरेलले बताए ।औद्योगिक क्षेत्रभित्रका सबै उद्योग निरन्तर सञ्चालन हुँदा मासिक १ अर्ब राजस्व बुझाउँदै आएको उनले जानकारी दिए।
सरकारलाई बुझाउने राजस्वको तुलनामा एक उद्योगले मासिक ३ करोड ३० लाख कारोबार गर्ने उनले दाबी गरे । एक उद्योगले दैनिक औसत ३ करोड ३० लाख कारोबार गर्दाकरिब २७ लाख मुनाफा हुने अनुमान गरिएको छ ।उद्योगीले यस्तो नोक्सान भूकम्प र नाकाबन्दीपछि भोग्नुपरेको अध्यक्ष पोखरेलले गुनासो गरे ।
लकडाउनको अवधि बढेमा वा कोरोनाको संक्रमण अझ बढी फैलिएमा केही उद्योग सधैँका लागि बन्द हुनसक्ने उनले बताए । तेस्रो मुलुकबाट कच्चा पदार्थ ल्याउनुपर्ने र बजारमा मागअनुसार उत्पादित वस्तु लैजान नसक्ने अवस्थाका कारण साना लगानीका केही उद्योग बन्द हुनसक्ने उनको दाबी छ ।
उद्योगीको चिन्ताः बैंकको ब्याज र कर्मचारीको तलब
लकडाउनपछि उद्योग पूर्ण रूपमा बन्द हुँदा हेटौँडा औद्योगिक क्षेत्रभित्रका उद्योगीहरू चिन्तित छन् । बैंकमा बुझाउनुपर्ने मासिक किस्ता, ब्याज र कर्मचारीलाई दिने तलब कसरी व्यवस्था गर्नेबारे चिन्तित भएको उद्योगीहरू बताउँछन् । सरकारले विपद्का कारण बन्द भएका उद्योगहरूका लागि ब्याजमा सहुलियत र विशेष प्याकेज नल्याए आफूहरूको स्थिति नाजुक हुने उनीहरूको गुनासो छ ।
उद्योगीहरूले उद्योग सञ्चालन नहुँदा बैंकमा बुझाउने किस्तासँगै कर्मचारी र मजदुरलाई कसरी तलब दिनेबारे आफूहरू अन्योल भएको गुनासो संघमा राख्दै आएका छन् । उनीहरूले सरकारले ब्याजमा सहुलियतसँगै विशेष प्याकेजको व्यवस्था गर्नुपर्ने माग राखेका छन् ।
४ हजार ५ सय मजदुर कामविहीन
मझौला र ठूला उद्योगमा कार्यरत४ हजार ५ सय मजदुर कामविहीन भएका छन् ।लकडाउनपछि हेटौँडा औद्योगिक क्षेत्रभित्रका १ सय ९ वटा उद्योग क्रमशः बन्द हुँदा मजदुरहरू कामविहीन भएका हुन् ।मासिक तलब आउने भएपनि कामविहीन हुँदा मजदुरहरू समस्यामा परेको औद्योगिक क्षेत्र मजदुर संघले जनाएको छ ।
उद्योग बन्द हुँदा तलब आउने–नआउनेसमेत अन्योल हुँदा मजदुर थप समस्यामा परेको संघको दाबी छ । कामविहीन बनेका र समस्यामा परेका मजदुरका लागि सरकारले तत्काल केही व्यवस्था गर्नुपर्ने उनीहरूको माग छ ।दैनिक ज्यालादारी गरेर जीविकोपार्जन गर्ने मजदुरका लागि राहत बाँडिएपनि रकम अभाव हुँदा आवश्यक सामग्री खरिद गर्न नसकिएको निर्माण सम्बद्ध श्रमिक संघले जनाएको छ ।
नयाँ पत्रिका दैनिक
यो नेपाली भाषाको अनलाइन पत्रिका हो । हामी तपाईमाझ खासगरी मकवानपुरकाे थाहा नगरपालिका र सँगसँगै तपाईंलाई काम लाग्ने देश-विदेशका समाचार, भिडियो, अडियो र विचार प्रकाशन गर्छौं । सुझाव, समाचार र विज्ञापनका लागि सम्पर्क : ९८५५०७८९१०(सम्पादक)
