थाहा नगर प्रमुखलाई विद्यालय कर्मचारीको ध्यानाकर्षण, तलब सुविधा बढाउन माग

नेपाल विद्यालय कर्मचारी युनियन,  थाहा नगर कमिटीले थाहा नगरपालिकाअन्तर्गतका सामुदायिक विद्यालयहरुमा कार्यरत विद्यालय कर्मचारीहरुको मासिक तलब नेपाल सरकारको दर्जा तथा तह अनुसार नभएको भन्दै गुनासो गरेको छ । 

सबै कर्मचारीहरुको एउटै मासिक तलब (रु. १५,०००) कायम गरिएको प्रति पनि युनियनले  ध्यानाकर्षण भएको जनाएको छ । युनियनका थाहा नगर अध्यक्ष मधुसूदन रायमाझीको नेतृत्वमा थाहा नगर कार्यालय पुगेको टोलीले नगरप्रमुख लवशेर विष्टलाई भेटेर ध्यानाकर्षण पत्र बुझाएको छ । 

ध्यानाकर्षण पत्रमा कक्षा  १० तथा कक्षा १२ सञ्चालन भएका विद्यालयहरुमा कार्यरत लेखापालहरुको छुट्टाछुट्टै दरवन्दी कायम गरी सोहीअनुसार तलबको व्यवस्थापन गर्न माग गरिएको छ । त्यसैगरी कक्षा १० तथा कक्षा १२ सञ्चालन भएका विद्यालयहरुमा कम्तिमा दुई जना कार्यालय सहयोगीको व्यवस्थापन गर्न र कार्यरत कार्यालय सहयोगीहरुलाई रु. १५ हजारबाट नघटाई तलब व्यवस्थापन गर्न पनि माग गरिएको छ । 

हालसम्म पनि विद्यालय कर्मचारीहरुले सरकारद्वारा घोषित महङ्गी भत्ता नपाइरहेको भन्दै युनियनले  आगामी आर्थिक वर्ष २०७८/८९ मा सो विषयलाई सम्बोधन गर्न माग गरेको छ । 

ध्यानाकर्षण पत्र बुझ्दै नगरप्रमुख विष्टले यस वर्षको लागि छलफल गर्न ढिला भएको भन्दै यथासम्भव समेटेर लैजाने आश्वासन दिएको अध्यक्ष रायमाझीले बताए ।