कोरोना संक्रमण भएर आइसोलेसनमा रहेका संक्रमितलाई अण्डा र मासु उपलब्ध गराउने भएको छ ।
मकवानपुर कुखुरा व्यवसायी संघले हेटौंडा–६, गौरीटार आइसोलेसनमा बसेका कोरोना संक्रमितहरुलाई एक महिनासम्म प्रतिव्यक्ति प्रतिदिन दुईवटा अण्डा र हप्तामा दुई पटक कुखुराको मासु सहयोग स्वरुप उपलब्ध गराउने भएको हो ।
मंगलबार कुखुरा व्यवसायी संघ मकवानपुर अध्यक्ष राजु अधिकारी, उपाध्यक्ष प्रतिमा श्रेष्ठ, गोकुलनाथ पौडेलले आइसोलेसनमा पुगेर हेटौंडा–६ का वडाअध्यक्ष अर्जुन चौलागाईं तथा हेटौंडा अस्पताल व्यवस्थापन समिति अध्यक्ष प्रकाश पौडेललाई अण्डा र मासु उपलब्ध गराएका छन् ।
संघले करिब १४ हजार रुपैयाँ बराबरको कोरोना संक्रमितको सरसफाइमा प्रयोग हुने विभिन्न सामग्री समेत आइसोलेसनलाई प्रदान गरेको छ ।
संघले एक महिनाका लागि करिब एकलाख ५५ हजार रुपैयाँ बराबरको अण्डा र मासु उपलब्ध गराएको र अण्डा र मासु आइसोलेसनसम्म ढुवानी गर्ने व्यवस्था मिलाएको अध्यक्ष अधिकारीले बताए ।
गौरीटार आइसोलेसनमा करिब ७० जना बिरामी रहेका छन् । यस्तै हेटौंडाको शिवम् सिमेन्टले आइासोलेसनमा बस्नेका लागि पानी तातो बनाउने २ वटा वाटर इलेक्ट्रिक डिस्पेन्सर उपकरण हस्तान्तरण गरेको हेटौंडा अस्पतालका अध्यक्ष प्रकाश पौडेलले बताए ।
यो नेपाली भाषाको अनलाइन पत्रिका हो । हामी तपाईमाझ खासगरी मकवानपुरकाे थाहा नगरपालिका र सँगसँगै तपाईंलाई काम लाग्ने देश-विदेशका समाचार र विचार प्रकाशन गर्छौं । सुझाव, समाचार र विज्ञापनका लागि सम्पर्क : ९७०५०७८९१०
