डोटीको आदर्श गाउँपालिका–७ नवाघरमा करेन्ट लागेर एक महिलाको मृत्यु भएको छ । मृत्यु हुनेमा स्थानीय २६ वर्षीया तुलसी थापा रहेकी छिन् ।
उनको शनिबार खानेपानी लिन धारामा गएको बेला करेन्ट लागेर घटनास्थलमै मृत्यु भएको जिल्ला प्रहरी कार्यालय डोटीले जनाएको छ ।
प्रहरीका अनुसार, सोही वडाका स्थानीय १९ वर्षीय सुर्ज किमाडीले पानीट्याङ्कीमा करेन्ट प्रवाह गरेका कारण निज महिलालाई करेन्ट लागेको प्रारम्भिक अनुसन्धानबाट खुलेको छ ।
पानीट्याङ्कीमा करेन्ट प्रवाह गर्ने किमाडीलाई प्रहरीले नियन्त्रणमा लिएको छ । उनलाई इलाका प्रहरी कार्यालय आदर्शबाट गएको प्रहरी टोलीले नियन्त्रणमा लिएको हो ।
नियन्त्रणमा रहेका किमाडीले गाउँको सार्वजनिक धारामा भारतबाट रोजगारी गरी घर फर्किएका कोरोनाको सङ्क्रमित भएका व्यक्तिले पनि पानी भर्न आउने गरेका कारण आफूले धारामा करेन्ट प्रवाह गरेको बयान दिएको प्रहरीले जनाएको छ ।
मृतक महिलाको शव परीक्षणका लागि जिल्ला अस्पताल डोटी ल्याइएको जिल्ला प्रहरी कार्यालय डोटीले जनाएको छ ।
यो नेपाली भाषाको अनलाइन पत्रिका हो । हामी तपाईमाझ खासगरी मकवानपुरकाे थाहा नगरपालिका र सँगसँगै तपाईंलाई काम लाग्ने देश-विदेशका समाचार र विचार प्रकाशन गर्छौं । सुझाव, समाचार र विज्ञापनका लागि सम्पर्क : ९७०५०७८९१०
