थाहा नगरमा पहिलो फास्ट ईभी चार्जिङ स्टेसन सञ्चालनमा

थाहा नगरपालिका–४, थानाबजारमा नगरकै पहिलो फास्ट ईभी चार्जिङ स्टेसन सञ्चालनमा आएको छ। ऋषेश्वर फास्ट चार्जिङ स्टेसनले थाहा नगरमा पहिलोपटक फास्ट चार्जिङ सेवा सुरु गरेको हो।

स्टेसनमा CCS2 र GBT दुवै प्रकारका चार्जिङ पोर्ट उपलब्ध रहेका छन्। यसबाट विभिन्न प्रकारका विद्युतीय सवारीसाधनलाई छिटो चार्ज गर्न सकिने सञ्चालकले बताएका छन्।

थाहा नगरपालिका पर्यटकीय गन्तव्यका रूपमा विकास हुँदै गएको अवस्थामा नेपालमा विद्युतीय सवारीसाधनको संख्या पनि बढ्दै गएको छ। तर पर्याप्त चार्जिङ स्टेसनको अभावका कारण विद्युतीय सवारीसाधनमार्फत थाहा नगर आउने पर्यटकलाई असहजता हुँदै आएको थियो। थानाबजारमा फास्ट चार्जिङ स्टेसन सञ्चालनमा आएसँगै विद्युतीय सवारीसाधनबाट थाहा आउने पर्यटकलाई थप सहज हुने अपेक्षा गरिएको छ।

थाहा नगरपालिका तथा नेपाल विद्युत् प्राधिकरण, पालुङ शाखाको सहयोगमा नगरमा आवश्यक रहेको चार्जिङ स्टेसन सञ्चालनमा ल्याइएको ऋषेश्वर फास्ट चार्जिङ स्टेसनका सञ्चालक प्रो. देवराज कार्कीले जानकारी दिए।

कार्कीका अनुसार चार्जिङ सेवासँगै स्टेसनमा वासिङ सेन्टर, ग्यारेज तथा रेस्टुरेन्ट समेत सञ्चालन गर्ने योजना रहेको छ। उनका अनुसार एउटै स्थानबाट चार्जिङ, सवारीसाधन मर्मत, सरसफाइ तथा खानाको सुविधा उपलब्ध गराउने उद्देश्य राखिएको छ।

थाहा नगरमा विद्युतीय सवारीसाधनका लागि आवश्यक पूर्वाधार विस्तार हुनु पर्यटन प्रवर्द्धनका दृष्टिले समेत महत्वपूर्ण मानिएको छ। चार्जिङ पूर्वाधारको विस्तारसँगै काठमाडौंलगायत विभिन्न स्थानबाट विद्युतीय सवारीसाधनमार्फत थाहा नगर भ्रमण गर्ने पर्यटकको संख्या बढ्ने अपेक्षा गरिएको छ।

स्थानीय स्तरमा विद्युतीय सवारीसाधनमैत्री पूर्वाधार विकासले थाहा नगरलाई पर्यटन तथा ईभीमैत्री गन्तव्यका रूपमा विकास गर्न थप सहयोग पुग्ने देखिन्छ।