राष्ट्रिय प्रजातन्त्र पार्टी (राप्रपा) को तर्फबाट थाहा नगरपालिकाको नगर प्रमुखको उमेद्वारी दिएका हरेराम कार्कीले आफूलाई जनताले स्थानीय तह निर्वाचनमा जिताए राष्ट्रको ढुकुटीबाट पाउने कुनै पनि सुविधा नलिने घोषणा गरेका छन् ।
नगर प्रमुखका प्रत्यासी कार्कीले थाहानगरको शिखरकोटमा पत्रकार सम्मेलन गरेर आफू नगर प्रमुखमा निर्वाचित भए सरकारले नगर प्रमुखका लागि तोकेको कुनै पनि तलब भत्ताको सुविधा नलिने घोषणा गरेका हुन् । उनले भने–‘मैले पाउने सुविधाबाट सामाजिक काम गर्छु ।’
राप्रपाले थाहा नगरपालिकाको नगर प्रमुख र उप प्रमुख सहित ११ वटा वडामा अध्यक्ष सहित पदाअधिकारीमा उमेद्वारी दिएको छ ।
जनताले भोट हालेर मकवानपुरको थाहानगरमा नगर प्रमुख पदमा राप्रपाका उमेद्वार हरेराम कार्कीलाई विजेता गराएमा कृषिमा आधुनिकीकरण गर्ने प्रतिवद्धता रहेको छ । थाहानगरलाई अत्याधुनिक कषि औजारको प्रयोग गरी आधुनीकीकरण गर्ने राप्रपाको चुनावी प्रतिवद्धता रहेको छ । राप्रपाले थाहा नगरको फोहोर व्यवस्थापन गर्ने प्रतिवद्धता पनि व्यक्त गरेको छ ।
नेपाल सरकारले पर्यटकीय शहरको रुपमा नीति तथा कार्यक्रममा घोषणा गरेको थाहालाई राप्रपाले पनि ‘पर्यटकीय शहर’ घोषणा गर्ने बताएको छ । थाहामा स्थायी घर भई देश विदेशमा रहेका युवालाई थाहामा लगानीको वातावरण बनाउने पनि राप्रपाको योजना छ । समग्र थाहाको शिक्षाको स्तर उकास्न सामुदायिक विद्यालयलाई प्रवद्र्धन गर्ने राप्रपाको योजना रहको छ । स्वास्थ्य समस्या समाधान गर्नको लागि सुविधा सम्पन्न अस्पताल निर्माण, थाहामा निर्माणाधिन क्षत्रिय रंगशाला निर्माण सम्पन्न, मन्दिर धर्मशाला संरक्षण, सहकारी व्यवस्थापन जस्ता सामाजिक कार्य पनि राप्रपाले अघि सारेको छ ।
‘आफ्नो गाउँ, आफै बनाऔं’ भन्ने मोडलमा थाहानगरको विकास गर्ने राप्रपाको योजना छ । कृषि शिक्षालाई उच्च प्राथगमिकतामा राख्दै संचार माध्यमलाई व्यवस्थापन गर्ने योजना पनि राप्रपाको रहेको छ । थाहालाई नमुना बनाउन बसपार्क निर्माणलगायतको पूर्वाधार खडा गरी ‘थाहा’लाई ‘आहा’ बनाउने राप्रपासंग भिजन भएको नगर प्रमुखका उमेद्वार कार्कीले बताए ।
हेर्नुहोस् भिडियोमा उमेद्वार कार्कीको प्रतिवद्धताः
तामाङ,थाहा टाइम्स डटकमका संवाददाता हुन् । उनी मकवानपुरको थाहानगरमा रहेर पत्रकारिता गरिरहेका छन् ।
