छिमेकी प्रदेश–२ को बारामा हावाहुरीका कारण मानवीय क्षति हुनुका साथै करिब चार सय जना घाइते भएको खबर पाएपछि प्रदेश–३ का मुख्यमन्त्री डोरमणि पौडेलसहितको टोली घटनास्थलमा पुगेको छ ।
सोमबार विहान पौडेलको नेतृत्वमा टोली बारा पुगेको हो । प्रदेशको छिमेकी प्रदेशमा पीडा पर्दा मल्हम लगाउन मुख्यमन्त्री पौडेलसहित दुई मन्त्री बारा पुग्नुभएको हो । उक्त स्थानमा मुख्यमन्त्री पौडेलसहित आन्तरिक मामिला तथा कानुन मन्त्री शालिकराम जम्कट्टेल र सामाजिक विकास मन्त्री युवराज दुलाल पनि पुग्नुभएको छ ।
पीडामा परेकाको उपचार र मृतक परिवारलाई सहयोग गर्न कसर बाँकी नराखिने मुख्यमन्त्री पौडेलले बताउनुभयो । हावाहुरीका कारण सबभन्दा बढी क्षति सहेको बाराको फेटा गाउँपालिका–१, पुरनियामा मुख्यमन्त्री पौडेल पुग्नुभएको छ ।
पुरैनियामा ९ जनाको मृत्यु भएको छ । घरहरुमा पनि व्यापक क्षति छ । मुख्यमन्त्रीले मृतकका परिवारलाई भेट्नुका साथै घाइतेसँग पनि भेट गर्नुभयो । छिमेकी प्रदेशमा समस्या पर्दाको पीडा सम्बोधन गर्न प्रदेश–३ सरकार तयार रहेको मुख्यमन्त्री पौडेलले बताउनुभयो ।
मन्त्री दुलाल नौं जना स्वास्थ्यकर्मीको टोली लिएर बारामा हुनुहुन्छ । मन्त्री दुलालले बाराको कलैया अस्पतालमा प्रदेशका स्वास्थ्यकर्मीलाई लिएर जानुभएको हो । हेटौंडाबाट गएका स्वास्थ्यकर्मीले त्यहाँ उपचार सेवा दिएका छन् । हुरीमा परी घाइते भएकालाई भेटेर उहाँले स्वास्थ्यलाभको कामना गर्नुभयो ।
हुरीमा परी घाइते भएकाको उपचारका लागि सहयोग गरिने मन्त्री दुलालले बताउनुभयो । हुरीका कारण भत्किएका घर, गोठ, विद्यालय, सार्वजनिक संरचनाको स्थलगत अवलोकनपछि मन्त्री दुलाल कलैया अस्पताल पुग्नुभएको थियो ।
उक्त बस्तीमा हावाहुरीमा परी १५ जनाको मृत्यु भएको थियो भने ८० जना घाइते भएको मुख्यमन्त्रीका स्वकीय सचिव अनुप पौडेलले बताउनुभयो । बस्तीमा एकै घरका चार जनाको मृत्यु भएको पाइएको उहाँले जानकारी दिनुभयो ।
‘खानेकुरा र अन्नपात माटोमा मिसिएका छन् । उनीहरुलाई तत्काल पानी र खानेकुरा आवश्यक देखिन्छ,’ स्वकीय सचिव पौडेलले बाराबाट भन्नुभयो–रातभर खुला आकाशमा बिताएका उनीहरु के खाउँ र कहाँ जाऔं भन्ने स्थितिमा छन् ।
स्थानीयले ३ हजार घरमध्ये ८० प्रतिशत घरमा क्षति पुगेको बताएका छन् । हावाहुरीले बाराको भरवलियाको एक घरसमेत सग्लो छैन । तीव्रगतिमा आएको हुरीका कारण ढलेका बिजुलीका पोल, रुख र घरका पर्खालमा च्यापिएर घरभित्र बसेकाहरुको मृत्यु भएको थियो । हुरीबतासका कारण धेरै जना घाइते भएको अनुमान छ । मृत्यु हुने र घाइतेको संख्या बढ्नसक्ने अनुमान छ । राति करिब ९ बजेदेखि आधा घण्टा असिनापानीसँगै हुरीबतास आएको थियो ।
यो नेपाली भाषाको अनलाइन पत्रिका हो । हामी तपाईमाझ खासगरी मकवानपुरकाे थाहा नगरपालिका र सँगसँगै तपाईंलाई काम लाग्ने देश-विदेशका समाचार, भिडियो, अडियो र विचार प्रकाशन गर्छौं । सुझाव, समाचार र विज्ञापनका लागि सम्पर्क : ९८५५०७८९१०(सम्पादक)
