हिन्दु धर्मका भगवान विष्णुको प्रतीकका रूपमा तुलसीको विवाह र विशेष पूजा गरी मनाइने हरिबोधिनी एकादशी दिन मकवानपुरको तीन स्थानमा मेला लागेको छ ।
मकवानपुरको थाहा नगरपालिका ४ स्थित ऋषेश्वर मन्दिरसहित भीमफेदी गाउँपालिका –१ स्थित त्रिखण्डी मन्दिर र मकवानपुर गढी गाउँपालिकामा रहेको गढी दरबारमा हरेक वर्षको एकादशीका दिनमा मेला लाग्ने गरेको छ ।
मेलाका अवसरमा २२ कार्तिक बिहानैबाट ऋषेश्वर मन्दिर, त्रिखण्डी मन्दिर र मकवानपुर गढीमा भक्तजनहरुको घुइचो लागेको थियो । गढी दरबारभित्र वंशगोपालको मन्दिर रहेको छ । मकवानपुरगढी गाउँपालिकाको आमभञ्ज्याङ, सुकौरा, बुढीचौर, हेटौंडाको हटिया हर्नामाडी, बकैयाको ठिङ्गनलगायत मकवानपुरको विभिन्न स्थानबाट मेलामा आउने गरेको मकवानपुरगढी वडा २ का अध्यक्ष बखान सिं पाख्रिनले बताए ।
थाहा नगरपालिका ४ स्थित ऋषेश्वर मन्दिरमा पूजा गर्न आउने तिर्थालु र मेला हेर्न आउने मानिसहरुको व्यवस्थापन र सुरक्षाकालागि इलाका प्रहरीले कार्यलय पालुङबाट प्रहरी खटिएको छ ।
त्रिभुवन राजपथको हेटौंडा काठमाडौं छोटोदुरीको सडकखण्डमा त्रिखण्डी मन्दिर पर्ने भएकाले प्रहरीको टोली खटाएर सुरक्षा व्यवस्था मिलाइएको जिल्ला प्रहरी कार्यालय मकवानपुरले जनाएको छ । दुर्घटना प्रभावित क्षेत्र र साना गाडी धेरै हिड्ने भएकाले क्षमता भन्दा बढी यात्रु बोक्ने यातायातको साधन चेकजाँच गरी सुरक्षा कडा पारिएको प्रहरी उपरीक्षक मुकेशकुमार सिँहले बताए ।
यो नेपाली भाषाको अनलाइन पत्रिका हो । हामी तपाईमाझ खासगरी मकवानपुरकाे थाहा नगरपालिका र सँगसँगै तपाईंलाई काम लाग्ने देश-विदेशका समाचार र विचार प्रकाशन गर्छौं । सुझाव, समाचार र विज्ञापनका लागि सम्पर्क : ९७०५०७८९१०
