उत्तरी मकवानपुरको ईन्द्रसरोवर गाउँपालिकामा रहेको नेपालकै सबैभन्दा ठूलो मानव निर्मित ताल कुलेखानी खतरायुक्त भएको भन्दै त्यसको संरक्षणका लागि राष्ट्रिय सभामा आवाज उठेको छ ।
राष्ट्रिय सभा सदस्य तथा संघीय संसदको प्रत्यायोजित व्यवस्थापन तथा सरकारी आश्वासन समितिका सभापति रामनारायण बिडारीले राष्ट्रिय सभामा बुधबार बोल्दै कुलेखानी खतरायुक्त भएको भन्दै त्यसको संरक्षणका लागि सरकारसंग आग्रह गरेका हुन् ।
बिडारीले तालमा माटो भरिँदै गएकोले ड्याम खतरायुक्त बन्दै गएको भन्दै यसको संरक्षणमा ध्यान दिन सरकारलाई ध्यानाकर्षण गराएका हुन् । उनले भने, ‘भोली त्यो ड्याम तलमाथी भयो भने सर्लाही र रौतहटसम्म बाढी जानसक्छ र ठुलो धनजनको क्षति हुनसक्छ, त्यसैले अहिल्यै सचेत बन्नु आवश्यक छ ।’
उनले २०७२ को भूकम्प पछि चर्किएको ड्याम फुट्दा तलका क्षेत्रमा ठूलो क्षति हुने भएकाले बेलैमा सचेत हुन सरकारको ध्यानाकर्षण गराए ।
बिडारीले बज्रबाराही, चित्लाङ, मार्खु भञ्ज्याङ, फाखेल, दामन, पालुङ, टिस्टुङ लगायतको क्षेत्र जलाधार क्षेत्र भएपनि यहाँको रुख विरुवा काटिएको र त्यहाँ भइरहेका निर्माण कार्यहरु, उत्खननका कार्यले तालको जलाधार क्षेत्र सुक्दै गएको बताउँदैे त्यसतर्फ संरक्षण विशेष पहल गर्नुपर्ने माग गरे ।
साथै उनले कञ्चनपुरकी बालिका निर्मला पन्तको बलात्कार र हत्या प्रकरणमा प्रमाण नष्ट गर्ने प्रहरीमाथि फौजदारी अभियोगमा किन कारवाही गरिएन भन्दै सरकारको ध्यानाकर्षण गराएका थिए ।
यो नेपाली भाषाको अनलाइन पत्रिका हो । हामी तपाईमाझ खासगरी मकवानपुरकाे थाहा नगरपालिका र सँगसँगै तपाईंलाई काम लाग्ने देश-विदेशका समाचार, भिडियो, अडियो र विचार प्रकाशन गर्छौं । सुझाव, समाचार र विज्ञापनका लागि सम्पर्क : ९८५५०७८९१०(सम्पादक)
