मकवानपुरको थाहानगर स्थित पालुङमा विधिपूर्वक कोतमौला पु्जा गरिएको छ । दशैको अवसरमा ऐतिहाँसिक शहर पालुङ मनाइने कोतमौला पर्व महानवमीको दिन १३ असोजमा मनाइएको हो । थाहा नगरपालिका वडा नम्बर २ मा पर्ने पालुङमा यो पर्व वर्षेनी मनाइन्छ ।
पालुङमा दशै घर, कोतमौला, फुलपाती चौरलगायतको ऐतिहासिक स्थलहरु रहेको छ ।
पहिले पहिले प्रधानपञ्चको संयोजकत्वमा मनाउने परम्परा रहेको भएपनि अहिले स्थानीयहरुले संयोजन गरेर यो पर्व मनाइरहेका छन् । महानवमीको अवसरमा भएको कार्यक्रममा थाहा नगरपालिका वडा नम्बर २ का वडा अध्यक्ष गुप्त बहादुर कार्की तथा पदाअधिकारीहरुको पनि उपस्थिती रहेको थियो ।
कोतमौलामा महानवमीको अवसरमा बोका, राँगालगायतको बली दिने परम्परा रहेको स्थानीय निरोज प्रधानले जानकारी दिए । महानवमीको अवसरमा कोत मौलामा पुजा गरेपछि मात्र स्थानीयहरुले आ–आफ्ना घरका मेशिनरी औजार, कुटो कोदालो, हसियाँ तथा अरु हतियारहरु पुजा गर्ने परम्परा छ । कोतमौलामा बली दिइएको बोका तथा राँगाको मासु प्रसादको रुपमा राखने परम्परा पनि रहेको छ ।
धार्मिक तथा साँस्कृतिक दृष्टिकोणले धनी पालुङको दशै घरमा हवन सहित महाअष्टमीको अवसरमा कालत्ररात्री गरिएको छ भने विजया दशमीको दिन टीका लगाउने परम्परा रहेको छ ।
पालुङको दशै घरमा घटस्थापनादेखि विजया दशमीसम्म स्थानीय नापित, मगर, भुजेल, अर्याल, ढकाल तथा नेवारी समुदायको संलग्नतामा पुजाआजा गर्ने परम्परा छ ।
यो नेपाली भाषाको अनलाइन पत्रिका हो । हामी तपाईमाझ खासगरी मकवानपुरकाे थाहा नगरपालिका र सँगसँगै तपाईंलाई काम लाग्ने देश-विदेशका समाचार र विचार प्रकाशन गर्छौं । सुझाव, समाचार र विज्ञापनका लागि सम्पर्क : ९७०५०७८९१०
