पूर्वपश्चिम राजमार्ग अन्तर्ग हेटौँडा–मनहरी खण्डमा पर्ने मनहरी ८ खरंगामा मोटरसाइकल र एम्बुलेन्स ठोक्किँदा दुईजना गम्भीर घाइते भएका छन् । घटनामा परी मनहरी गाविस वडा नम्बर ७ का २० वर्षिय प्रदिप गिरी र उनकी दिदी ३० वर्षिया दीपा गिरी गम्भीर घाइते भएका हुन् । घाइतेहरुको चुरेहिल अस्पताल हेटौंडामा प्रारम्भिक उपचारपछि थप उपचारको लागि भरतपुर पठाइएको जिल्ला प्रहरी कार्यालय मकवानपुरले जनाएको छ ।
नारायणगढतर्फबाट हेटौँडातर्फ गइरहेको ना ४१ प १४३१ नम्बरको मोटरसाइकलले खरंगास्थित मन्दिर नजिकैको मोडमा बिपरित दिशातर्फबाट आइरहेको एम्बुलेन्सलाई ठक्कर दिएको थियो ।
ठक्करबाट एम्बुलेन्स र मोटरसाइकल दुबैमा क्षति पुगेको छ । दुर्घटनामा परेका मोटरसाइकल र एम्बुलेन्स इलाका प्रहरी कार्यालय मनहरिमा राखिएको छ ।
