विश्व बालश्रम विरुद्ध दिवसको अवसर पारी उत्तरी मकवानपुरको थाहा नगरपालिकामा बालश्रम मुक्त थाहा नगरपालिका घोषणाका लागि सामुहिक प्रतिबद्धता पत्रमा हस्ताक्षर गरिएको छ ।
थाहा नगरपालिका सामाजिक विकास शाखाको आयोजनामा २९ जेठमा शिखरकोटको विकास घरमा एक कार्यक्रमको आयोजना गरि समाजमा भएको बालश्रम न्यूनीकरणमा जिम्मेवार व्यक्तित्वहरुको प्रतिबद्धता सहित प्रतिबद्धता पत्रमा हस्ताक्षर गरिएको हो ।
थाहा नगरपालिका सामाजिक विकास समितीका सदस्य जानुका ढकालको सभाध्यक्षतामा सञ्चालन भएको कार्यक्रममा सामाजिक विकास शाखाका प्रमुख अनिल लामिछानेले कार्यक्रमको उदेश्य बारे जानकारी गराएका थिए । उनले थाहा नगरलाई यहि आर्थिक वर्षको असार २० गते भन्दा अगाडि नै बालश्रम मुक्त नगर घोषणा गर्ने लक्ष्य रहेको बताए । जसका लागि नगरले अहिले बालश्रम भए नभएको जानकारीका लागी घरधुरी सर्वेक्षण, होटल, कारखाना तथा औद्योगिक क्षेत्रमा भैरहेको बालश्रमको प्रहरीको सहयोगमा पनि सर्भेक्षण लगायतका कार्यहरु गरिसकिएको उनले जानकारी दिए ।
उनले नगरपालिकाको लक्ष्यलाई प्राप्त गर्न सबै सरोकारवाला तथा जिम्मेवार व्यक्तिहरुले अपनत्व दिएर प्रतिबद्धता व्यक्त गर्दै काम गर्नका लागि अनुरोध गरे ।
कार्यक्रममा सञ्चारकर्मी कुमार नेगी, सुरेन्द्रमान प्रधान, यादवजंग रायमाझी लगायतले आफ्नो धारणा राखेका थिए । कार्यक्रममा थाहा नगरपालिकाका विभिन्न वडाका वडाध्यक्षहरु, कार्यपालिका सदस्यहरु, राजनीतीज्ञ, समाजसेवी, बुद्धिजीवी सञ्चारकर्मी तथा सरोकारवालाहरुको सहभागिता रहेको थियोे ।
बलामी, थाहा टाइम्स डटकमका संवाददाता हुन् । उनी मकवानपुरको इन्द्रसरोवर गाउँपालिकामा रहेर पत्रकारिता गरिरहेकी छिन् ।
