मकवानपुर थाहा नगरपालिका वडा नम्बर ७ र ८ मा गठन भएका उपभोक्ता समितिका पदाअधिकारीहरुलाई अनुशिक्षण दिइएको छ ।
थाहा नगरपालिकाले आर्थिक वर्ष २०७६/०७७ मा संचालन गर्ने गरी नगरसभाले स्वीकृत गरेका योजनाहरुलाई सहज र व्यवस्थित रुपमा संचालन गर्नको लागि कार्यक्रमको आयोजना गरिएको नगरपालिकाले जनाएको छ ।
थाहा–७, डाँडाबासमा भएको अनुशिक्षण कार्यक्रममा दुई वटा वडाका उपभोक्ता समितिका पदाअधिकारीहरुको सहभागिता रहेको थियो । सहभागीहरुलाई थाहा नगरपालिकाका प्रमुख प्रशासकीय अधिकृत हरिलाल पुरीले सहजीकरण गरेका थिए । सहजीकरणका क्रममा प्रमुख प्रशासकीय अधिकृत पुरीले उपभोक्ता समिति गठनदेखि योजना संचालन तथा भूक्तानी प्रक्रियासम्मको विषयमा जानकारी गराएका थिए ।
थाहा नगरपालिका वडा नम्बर ८ का वडा अध्यक्ष टिकाराम रुम्बाको सभाध्यक्षतामा भएको कार्यक्रममा ८ नम्बर वडा सदस्य सुमन कार्की, ७ का वडा सदस्य दिपेन्द्र थिङ, थाहा नगरपालिकाका इन्जिनियर सन्तोष बोहोरा, योजना शाखाका प्रकाश कुमार लामालगायतकाको उपस्थिती रहेको थियो । नगरपालिकाले यस किसिमको कार्यक्रम गत आर्थिक वर्षबाटै संचालन गर्दै आएको छ ।
यो नेपाली भाषाको अनलाइन पत्रिका हो । हामी तपाईमाझ खासगरी मकवानपुरकाे थाहा नगरपालिका र सँगसँगै तपाईंलाई काम लाग्ने देश-विदेशका समाचार र विचार प्रकाशन गर्छौं । सुझाव, समाचार र विज्ञापनका लागि सम्पर्क : ९७०५०७८९१०
