मकवानपुर थाहा नगरपालिकाले घरमा बसेका वडा सचिवहरुलाई तत्काल कामकाजमा फर्कन निर्देशन जारी गरेको छ । नगरपालिकाले विश्व महामारीको रुपमा रहेको कोरोना भाइरस (कोभिड–१९) को रोकथाम तथा नियन्त्रणका विभिन्न अभियान संचालन गरिरहेकोमा यस कार्यमा सचिवहरुलाई खटिन भनेको हो ।
कोरोना भाइरस रोकथाम तथा नियन्त्रण समन्वय समितिको सचिवालय थाहा नगरपालिकाले निर्णय गरी वडा कार्यालयहरुमा परिपत्र गरिएको सचिवालय संयोजक विवेक विडारीले जानकारी दिए । साथै, हाल हाजिर भै कामकाज गरिरहेका सचिवहरुको पनि विदा स्वीकृत नगर्न र विदामा नबस्न वडाहरुलाई परिपत्र गरिएको विडारीले जानकारी दिए । थाहा नगरपालिकामा १२ वटा वडा रहेका छन् ।
लकडाउनको बेला सरकारले दैनिक कामकाज बन्द गरी घरैमा प्रविधिको भरपुर प्रयोग गरेर कोरोना भाइरस नियन्त्रण तथा रोकथाम अभियानमा सहभागी हुन सबै सरकारी कर्मचारीहरुलाई भनेको थियो ।
यसअघि मकवानपुरकै कैलाश गाउँपालिकाले पनि सचिवहरुलाई नियमित कार्यालयमा हाजिर हुन सूचना प्रकाशन गरेको थियो ।
यो नेपाली भाषाको अनलाइन पत्रिका हो । हामी तपाईमाझ खासगरी मकवानपुरकाे थाहा नगरपालिका र सँगसँगै तपाईंलाई काम लाग्ने देश-विदेशका समाचार, भिडियो, अडियो र विचार प्रकाशन गर्छौं । सुझाव, समाचार र विज्ञापनका लागि सम्पर्क : ९८५५०७८९१०(सम्पादक)
