मकवानपुरको मकवानपुरगढी गाउँपालिका वडा नम्बर ८ बुढिचौरलाई प्लाष्टिक घर भित्र तरकारी खेती पकेट क्षेत्र घोषणा गरिएको छ ।
बुढीचौरमा प्लाष्टिकको टनेल भित्र व्यावसायिक तरकारी खेतिमा सहयोग गर्न पकेट क्षेत्र घोषणा गरिएको हो । “मकवानपुरगढी गाउँपालिकाको समृद्धिको आधार शिक्षा, कृषि, पर्यटन र पूर्वाधार” भन्ने नारासहित कार्यक्रम भएको हो । कार्यक्रममा मकवानपुरगढी गाउँपालिकाका अध्यक्ष बिदुर हुमागाइले बुढिचौरलाई पकेटक्षेत्र घोषणा गरेका हुन् ।
कार्यक्रममा अध्यक्ष बिदुर हुमागाइले बेमौसमी तरकारी खेतीलाई प्रोत्साहन गर्न पकेट क्षेत्र घोषणा गरिएको बताए । उनले टनेल भित्र विविधीकरणको खेती गर्न आग्रह गरे। कार्यक्रममा उनले कृषकहरुलाई अर्गानिक खेतीलाई प्राथमिकता दिन अनुरोध गरे । बुढीचौरमा मौसम राम्रो भएकोले तरकारी उत्पादन पनि धेरै हुने बताए । पशुपालनलाई जोडेर अर्गानिक रुपमा जैविक विषादीको प्रयोगबाट तयारी खेति गर्न उनले कृषकहरुलाई आग्रह गरे ।
कार्यक्रममा मकवानपुरगढी गाउँपालिकाका कृषि प्राविधिक चन्द्रकान्त चौधरीले गाउँपालिकाको कार्यपालिका बैठकबाट निर्णय भए बमोजिम कार्यक्रम अगाडि बढाइएको जानकारी दिए ।
यो नेपाली भाषाको अनलाइन पत्रिका हो । हामी तपाईमाझ खासगरी मकवानपुरकाे थाहा नगरपालिका र सँगसँगै तपाईंलाई काम लाग्ने देश-विदेशका समाचार, भिडियो, अडियो र विचार प्रकाशन गर्छौं । सुझाव, समाचार र विज्ञापनका लागि सम्पर्क : ९८५५०७८९१०(सम्पादक)
