मकवानपुर थाहा नगरपालिकामा दुर्लभ सालक फेला परेको छ । थाहा नगरपालिका वडा नम्बर २ खाल्डे बजार नजिकैको नालामा १४ असार साँझ सालक फेला परेको स्थानीय सुशान्त ढकालले जानकारी दिए । यस क्षेत्रमा हालसम्म सालक पाइएको थिएन । ‘क्लाइमेट चेन्ज’संगै यस क्षेत्रमा पनि सालक पाइएको हुनसक्ने अनुमान छ ।
नालामा भेटिएको सालकको स्थानीयहरुले उद्धार गरेर इलाका प्रहरी कार्यालय पालुङमा बुझाएका छन् । भेटिएको सालक कुन जातको भन्ने कसैले चिनेनन् । सालकको आहारा कमिला तथा धमिरालगायतका किरा भएकाले उक्त सालक आहारको खोजीमा निस्किएको हुनसक्ने स्थानीइहरुको अनुमान छ ।
यसको अवैध सिकारसमेत हुने गरेको छ । सालकलाई मासु र त्यसको खपटाबाट क्यान्सर तथा दमको रोग निको हुने विश्वास गरिने भएकाले त्यसको बढी सिकार गर्ने गरेको बताइन्छ । यस प्रकारको प्रजाति समुद्र सतहदेखि एक हजारदेखि दुई हजार २०० मिटरसम्मको उचाइमा पाइने यससिंग सम्बन्धीत जानकारहरु बताउँछन् ।
उद्वार गरिएको सालकलाई १५ असारमा जनप्रतिनीधि, पत्रकार, वन कार्यालयका प्रतिनीधिसहितको सहभागितामा सुरक्षित स्थानमा छोडिने बताइएको छ । विश्वमा पाइने आठ जातिका सालकमध्ये नेपालमा कालो सालक (अतिसङ्कटापन्न) र तामे सालक (लोपोन्मुख) गरी दुई जातिका सालक पाइन्छ ।
यो नेपाली भाषाको अनलाइन पत्रिका हो । हामी तपाईमाझ खासगरी मकवानपुरकाे थाहा नगरपालिका र सँगसँगै तपाईंलाई काम लाग्ने देश-विदेशका समाचार, भिडियो, अडियो र विचार प्रकाशन गर्छौं । सुझाव, समाचार र विज्ञापनका लागि सम्पर्क : ९८५५०७८९१०(सम्पादक)
