आयातित विचार
जब टुप्पोको राजमार्गबाट
एकाएक खप्पर तर्फ हानिन पुग्छ
तब आदर्शको इतिहास
अचानक गर्लम्म भत्किन थाल्छ
क्रमशः शरिरको इन्द्रियले
भनेकै समय छोडिदिन्छ काम गर्न
भ्रमित लाग्छन् --
स्थापित मान्यताका दस्तावेज
आयातित तर्कहरूको मुस्लोमा
थिचिन पुग्छ -- संस्कृति र मानव सभ्यता ।
-- आँखाबाट खसिरहेको पीडाको झरना
-- मुटुमा दन्किरहेको आक्रोशको आगो
र , पैतलाले बर्षौ देखि बोकिरहेको यातनाको पहाड
अेा सरकार !
कहाँ लिपिबद्ध छ
उपेक्षाको पहिरोले पुरिएको मान्छेको अभिलेख
अनिकाल रत्यौली खेलिरहेको चुलो
र , भोक बाँचिरहेका पेटको गणना
कुन तथ्यांकमा भेटिन्छ ?
देखिन्छ या देखिदैन
सरकारी ऐनामा
एक मुठ्ठी माटोको खातिर लडिरहेका
शरणार्थीहरूको सुकुम्बासी अनुहार ।
तिरस्कारको पसल थापेर
बदनामको व्यापारमा हिडेका तस्करहरू
पल्टाउँदैछन् -- संविधानको धाराहरू
लुटेर आमाको अस्मिता
या रेटेर ससाना नानीहरूको गला
राष्ट्रकै सिमा बेचेर फर्केका देशद्रोहीहरू
लेखिरहेछन् आफ्नै हातबाट -- कानुनको किताब ।
गिद्धहरू
धरहराको अग्लो टुप्पोबाट
अलाप्दैछन् -- अमनचैनको कुरा
उता न्यायालयमा विराजमान जल्लाद
फैसला सुनाउँदै छ आफु अनुकूल
घुम्ने मेचमा बसेर ब्वाँसो
दैनिक जारी गर्छ -- अध्यादेश
प्रतिपक्ष नामको चलाख स्याल पनि
बिरोध गरे झैं
समर्थनको लाल मोहर लगाइरहन्छ सदनमा ।
" समृद्ध नेपाल "
कुनै पेय पदार्थको बिज्ञान जस्तै
बजिरहन्छ रेडियोमा
आयातित पोशाकमा सजिएको
कथित बौद्धिक मानिएका
कुनै व्यक्तिको तस्बिर देखाएर
सुखी नेपालीको हेट लाइन छाप्छ चर्चित अखबारहरू।
कुनै बेला यस्तो लाग्छ --
सिङ्गै धर्ती एउटा व्यापार केन्द्र हो
-- पार्टीले सिद्धान्त बेच्छ
-- सरकारले आश्वासन बेच्छ
-- पत्रकारले कलम बेच्छ
-- बुद्धिजीवीले आदर्श बेच्छ ।
रोजेको चिज किन्न पाइने
भएको सामान बेच्न पाइने
आखिर सबैको प्रिय ठाउँ बजार हो ।
कृपया याद राख्नु महोदय !
तपाईं मान्छे नै रहन चाहानु हुन्छ भने
किमार्थ स्वाभिमान नबेच्नु / इमान नबेच्नु ।
यो नेपाली भाषाको अनलाइन पत्रिका हो । हामी तपाईमाझ खासगरी मकवानपुरकाे थाहा नगरपालिका र सँगसँगै तपाईंलाई काम लाग्ने देश-विदेशका समाचार, भिडियो, अडियो र विचार प्रकाशन गर्छौं । सुझाव, समाचार र विज्ञापनका लागि सम्पर्क : ९८५५०७८९१०(सम्पादक)
