थाहा नगरपालिकाले चालु आर्थिक वर्षको बजेटबाट निःशुल्क स्वास्थ्य बीमा शुरु गरेको छ । चालु आर्थिक वर्षको बजेटबाट सरकारले सूचीकृत गरेका ८ वटा कडा रोगहरु जस्तै क्यान्सर, मुटु, मृगौला, अल्जाइमर आदिका बिरामीहरुलाई लक्षित गरी निशुल्क स्वास्थ्य बीमा शुरु गरेको हो ।
थाहा नगरपालिकाका प्रमुख लवशेर विष्टले नगर कार्यपालिकामा आयोजित एक कार्यक्रममा स्वास्थ्य बिमा कार्ड वितरण गरेर यस वर्षको निःशुल्क स्वास्थ्य बीमा कार्यक्रम शुरु गरेका हुन् । थाहा नगरले चालु आर्थिक वर्षका लागि नगरभरिका ३०० जनालाई निःशुल्क स्वास्थ्य बीमा गर्ने लक्ष्य राखेको छ ।
यसअघि गतवर्ष पनि थाहानगरका ३०० जनाको निःशुल्क स्वास्थ्य बीमा गरिएको थाहा नगरपालिकाका सूचना अधिकारी सुरजकुमार भुजेलले जानकारी दिए ।
स्वास्थ्य बीमाको लागि प्रत्येक वडाबाट प्राथमिकताको आधारमा २५ जनाको नाम सिफारिश गर्न वडा कार्यालयहरुलाई पत्रचार गरिएको नगर प्रमुख विष्टले जानकारी दिए ।
निःशुल्क स्वास्थ्य बीमाका लागि गत आर्थिक वर्षमा थाहा नगरपालिकाले रु ११ लाख खर्च गरेको थियो भने चालु आर्थिक वर्षका लागि पनि रु. ११ लाख बजेट पारित गरिसकेको छ । गत वर्ष विपन्न वर्गलाई लक्षित गरिएकोमा यस वर्ष विपन्नका साथै कडा रोगका बिरामीहरुलाई लक्षित गरिएको नगरपालिकाले जनाएको छ ।
यो नेपाली भाषाको अनलाइन पत्रिका हो । हामी तपाईमाझ खासगरी मकवानपुरकाे थाहा नगरपालिका र सँगसँगै तपाईंलाई काम लाग्ने देश-विदेशका समाचार, भिडियो, अडियो र विचार प्रकाशन गर्छौं । सुझाव, समाचार र विज्ञापनका लागि सम्पर्क : ९८५५०७८९१०(सम्पादक)
