अभिनयको जीवन यात्रामा गीता राईले २०० भन्दा बढी म्यूजिक भिडियोमा मोडेलिङ गरिन्, र, पछिल्लो पटक वर्षको उत्कृष्ट लोकदोहोरी मोडल बनायो ‘निष्ठुरी मायालु’ले । यसवर्ष राष्ट्रिय नाचघरमा आयोजित म्युजिक खबर म्युजिक अवार्ड घोषणा कार्यक्रममा उनले वर्षको सर्वाेत्कृष्ट म्यूजिक भिडियो मोडलको अवार्ड जितिन् ।
उक्त अवार्डका लागि राईसँगै अञ्जली अधिकारी (मायाको पोको), पार्वती राई (डाँडैमा विजुली), पूर्णिमा श्रेष्ठ (झिने चुरा) र रश्मी तामाङ (आज गाउँमा) गरी ५ जना मोडलहरु मनोनयनमा परेका थिए । कार्यक्रममा ३४ विधामा अवार्ड प्रदान गरिएको थियो ।
को हुन् गीता राई ?
०३६ साल असोज ११ गते पिता सुनिल राई र माता कुमारी राईको कोखबाट जन्मेकी गीता राई सानै देखि नृत्य भनेपछि हुरुक्कै हुन्थिन् । र, उनलाई समयले बनायो पनि एक उत्कृष्ट नृत्याङ्ना । नृत्ययात्राको क्रममा हालसम्म उनले २०० भन्दा भन्दा बढी म्युजिक भिडियोमा अभिनय गरिसकेकी छिन् । तीमध्ये झिमझिम सानु नझिम्क्याउ परेली, चाहियो जागिर, निष्ठुरी मायालु, छाडी जाने निष्ठुरी, उनकै सम्झनामा, तिते करेली, पछ्यौरी लेउ बैना आदि चर्चित छन् ।
कौडा, सालैज्यो, झ्याउरे, नेवारी, सेलो, लगायत नेपाली मौलिक नृत्यहरूमा पारङ्गत गीता अभिनयकै शिलशिलामा हङ्कङ, जापान, बेल्जियम, अस्ट्रेलिया, क्यानडा, सिङ्गापुर लगायत धेरै देश पुगिसकेकी छिन् । संलग्नताको हिसावले भने उनी नेपाल प्रहरीको साँस्कृतिक विभागमा छिन् ।
आफूलाई भद्धा रुपमा भन्दा सभ्य तरिकाले प्रस्तुत गर्नुपर्छ भन्ने मान्यता राख्ने गीता समाजले कलाकारबाट धेरै सिको गर्ने भएकाले कलाकार सभ्य र शालीन हुनुपर्ने तर्क राख्छिन् । भन्छिन्, ‘हामी समाज अनुसार चल्न सक्नुपर्छ ।’
अनि ‘निष्ठुरी मायालु’
“पागल भाछु ऐले
धोका दियो निष्ठुरी मायालु हाँस्नै बिर्सेँ मैले”
मकवानपुरे लोक गायक तथा सर्जक बुद्धिमान घिसिङको लय र शब्द रहेको लोकदोहोरी एल्बम ‘निष्ठुरी मायालु’ । घिसिङ र चर्चित गायिका मुना थापाको स्वर रहेको एल्बममा चर्चित मोडल गीता राई र गायक स्वयम्को अभिनय रहेको छ । एल्बमको छायाँकन राजेश घिमिरेले गरेका हुन् भने प्रेम थापाको निर्देशन र बिन्ध्यबासिनी म्युजिक प्रालिको उत्पादनमा सो एल्बम बजारमा आएको थियो ।
हेर्नुहोस भिडियो :
