‘खेलाडीसे किकसे ठिकलाला म्लाङ प्वाँहारला पिकसे ठिक लाला ।’ जब खलनायक म्लाङ प्वाँहारले यो डाईलग बोल्छन् तब दर्शकहरुमा हाँसोको फोहोरा छुट्छ अनि पर्र ताली पड्कन्छ । कहिले हाँसोको फोहोरा अनि कहिले कारुणिक पिडामा छट्पटाउँछन् दर्शकहरु । यो दृश्य हो ओम चलचित्र हलमा तामाङ कथानक चलचित्र ‘म्लाङ प्वाँहार’ को च्यारिटी शोको ।
ग्रेटर ताम्सालिङ मिडिया प्रा.लि.द्धारा संचालित रेडियो ताम्सालिङ अनलाईनको आयोजनामा आज शनिबार हेटौंडाको ओम हलमा कलाकारहरु सहितको उपस्थितिमा तामाङ चलचित्र ‘म्लाङ प्वाँहार’को बिशेष प्रदर्शन गरिएकोे हो ।
करिब ५ सय भन्दा बढी दर्शकहरुको उपस्थिति रहेको शोमा चलचित्रका निर्माता एवं खलनायक बिकु थोकर, नायिका सुनिता लुङ्बाका साथमा संचारकर्मी लगायत अन्य तामाङ बुद्धिजिवीहरुको उपस्थिति रहेको थियो ।
तामाङ चलचित्रलाई गाउँगाउँमा पुराउने अभियान सुरुवात गरेका निर्माता थोकरको यो २१ औँ च्यारिटी शो हो । यस अघि पनि यो चलचित्रलाई देशका विभिन्न स्थानहरु र गाउँ–गाउँमा प्रदर्शन गरिसकिएको छ । चलचित्र नेफ्टा अवार्डमा उत्कृष्ट ५ जनाजाति चलचित्रको सूचिमा समेत पर्न सफल भएको थियो ।
सामाजिक कथावस्तुमा तयार भएको चलचित्रले गाउँमा राम्रो नेतृत्वकर्ता छान्न नसक्दा कस्तो नियति भोग्नुपर्छ भन्ने कुरालाई उठान गरेको छ । तामाङ भाषामा बनेता पनि चलचित्रले सम्पूर्ण नेपाली समाजको कथा बोकेको छ । गाउँको स्थानिय चुनावमा अध्यक्ष चयनको विषयलाई उठान गरेर नेपाली राजनितिको तिखो ब्यङ्ग्य गरिएको छ चलचित्रमा । यो चलचित्रमा राजनितिक विषय केन्द्रबिन्दुमा रहेता पनि उत्कृष्ट गीतसंगितका साथमा चलचित्रलाई आवश्यक पर्ने मसलाहरुले भरिएको छ चलचित्र । चलचित्रलाई शंकर महर्जनले निर्देशन गरेका हुन् ।
थोकर फिल्म्स् प्रा.लि.को पहिलो चलचित्र म्लाङ प्वाँहारमा चलचित्रका निर्माता थोकर, सुनिता लुङ्बा, जंगे लोप्चन, सफल दोङ, सुनिता दोङ लगायतको कलाकारहरुको मूख्य भूमिका रहेको छ । चलचित्रमा बिशाल कल्तान र बिशाल थिङको संगित संयोजन रहेको छ ।
चलचित्रको प्रदर्शनबाट प्राप्त रकम रेडियो ताम्सालिङ अनलाईनको विकास कार्यका लािग हस्तान्तरण गरिएको निर्माता थोकरले जानकारी दिए । रेडियो ताम्सालिङ अनलाईनको पहिलो प्रयासलाई सबैले सहयोग गरेको जानकारी दिँदै रेडियोका संचालक दिलबहादुर लामा तामाङले आगामी दिनमा पनि यस्तै सहयोगको अपेक्षा गरेको बताए ।
चलचित्रको च्यारिटी शोको सुरुवातमा चलचित्रका कलाकारहरु बिकु थोकर, सुनिता लुङ्बा, राधिका स्याङ्ता, संचारकर्मी सुदिन दोङ र अमिर योञ्जनलाई तामाङ चलचित्र संघका अध्यक्ष सन्तकुमार दोङ तथा सचिव राजकुमार गोलेद्धारा खादा ओढाएर सम्मान गरिएको थियो ।
-चन्द्र घलान , हेटौंडा
यो नेपाली भाषाको अनलाइन पत्रिका हो । हामी तपाईमाझ खासगरी मकवानपुरकाे थाहा नगरपालिका र सँगसँगै तपाईंलाई काम लाग्ने देश-विदेशका समाचार, भिडियो, अडियो र विचार प्रकाशन गर्छौं । सुझाव, समाचार र विज्ञापनका लागि सम्पर्क : ९८५५०७८९१०(सम्पादक)
