nakuhine-bastu-sankalan-1706086939.jpg
Wednesday, 29th May, 2024
वि.स.
1000043965-1707579226.jpg

ग्यास आगलागीबाट बच्न थाहानगरमा सचतेनामूलक कार्यक्रम

1111-1699280212.jpg

भान्सामा प्रयोग हुने ग्यास आगलागीबाट बच्न स्थानीय स्काउट कार्यालय थाहा नगरपालिकाले २० कात्तिकमा नगरको ३ वटा मुख्य बजारहरुमा सचेतनामूलक प्रदर्शनी कार्यक्रम गरेको छ ।  

थाहा नगरपालिकाको सहयोगमा नगरको डाँडाबास, शिखरकोट र ओखरबजारमा भान्सामा प्रयोग हुने ग्यासबाट हुने आगलागीबाट बच्ने उपायहरुबारे अभ्यास कार्यसहित सचेतना कार्यक्रम गरिएको हो । 

स्थानीय बासिन्दाहरुको उल्लेख्य सहभागिताबीच डाँडाबासमा विहान, शिखरकोटमा मध्यान्ह र ओखरबजारमा अपरान्ह कार्यक्रम सञ्चालन गरिएको स्थानीय स्काउट समितिका संयोजक गणेशमान श्रेष्ठले जानकारी दिए । डाँडाबासमा ७५ जना, शिखरकोटमा ९९ जना र ओखरबजारमा ९२ जना गरी कुल २६६ जना सहभागी भएको उनले बताए । 

खुल्ला रुपमा गरिएको कार्यक्रममा प्रदेश स्काउट सदस्य अशोक सारु मगर र रोभर लिडर अनिल आचार्यले एलपी ग्यास किन्ने बेलामै ध्यान दिनुपर्ने कुराहरु, ग्यास जोड्दा ध्यान दिनुपर्ने कुराहरु, ग्यास प्रयोग गर्दा ध्यान दिनुपर्ने कुराहरुको बारेमा जानकारी दिँदै ग्यासबाट आगलागी भइहालेमा के गर्ने भनेर प्रयोगात्मक अभ्यास गराएका थिए । प्रयोगात्मक अभ्यासको क्रममा फायर एक्सटिङ्गुसर(आगो निभाउने यन्त्र)को समेत प्रयोग गरी दनदनी बलेको आगो निभाइएको थियो । अभ्यासमा स्थानीय समुदायका गृहिणीहरुको उल्लेख्य सहभागिता रहेको थियो ।

शिखरकोटको कार्यक्रममा थाहा नगरपालिकाका नगर उपप्रमुख एवम् प्रमुख स्काउट भरत गोपाली सहभागी भएका थिए । डाँडाबासमा भएको कार्यक्रममा थाहा नगरपालिका वडा नम्बर ७ का वडा अध्यक्ष शिवराज थिङ सहभागी थिए । कार्यक्रममा इलाका प्रहरी कार्यालयका प्रमुख श्याम थापा मगरसहित प्रहरी, नगर प्रहरी, पत्रकार लगायतको सहभागिता रहेको थियो । सो अवसरमा स्काउटरहरु तथा स्काउट ट्रुपहरुको समेत सहभागिता रहेको स्थानीय स्काउट समिति सदस्य राम महर्जनले जानकारी दिए । 

ग्यास पड्केर आगलागी भइहालेमा के गर्ने भन्ने सामान्य जानकारी पनि नहुँदा समस्या निम्तिन सक्ने भन्दै जोखिम न्यूनीकरणमा कार्यक्रम निकै सहयोगी रहेको कार्यक्रममा सहभागीहरुले बताएका छन् । ‘ग्यास आगलागी भइहालेमा कुचो, बाल्टिन, कम्बल जस्ता घरमै रहेका सामानहरुको प्रयोग गरेर कसरी नियन्त्रण गर्ने  भन्ने जानकारी पायौँ, कार्यक्रम एकदमै व्यवहारिक छ,’ ओखरबजारको कार्यक्रममा सहभागी अनरङ प्रधानले भने ।

२०७८ सालको जनगणना अनुसार थाहा नगरपालिकामा ३६.७ प्रतिशत परिवारले ग्यास चुल्होको प्रयोग गर्दछन् । नेपाल प्रहरीका अनुसार ग्यास सिलिन्डर लिक भएर भएका आगलागीबाट पछिल्लो तीन वर्षमा मात्रै काठमाडौं उपत्यकामा नौ जनाको ज्यान गएको छ भने मुलुकभर ४२ जना घाइते भएका छन् ।  नेपालमा ग्यास सिलिन्डर लिक भएर भएका आगलागीबाट गत वर्षमात्र एक जनाको ज्यान गएको थियो भने सांसद चन्द्र भण्डारीसहित १६ जना घाइते भएका थिए । 

नेपालमा ग्यास व्यवसायको झन्डै ६० वटा कम्पनीमार्फत एक करोड ५० लाखवटा सिलिन्डरहरू बजारमा पठाएको तथ्याङ्क छ । त्यसमध्ये एक करोड १६ लाख ८४ हजार आठ सय १० सिलिन्डरको तथ्यांक यकिन गरिएको छ । मूलतः प्रत्येक महिना मुलुकभर करिब ३२ लाख ४० हजार सिलिन्डर खपत हुन्छ ।



https://thahatimes.com/public/images/users/Thaaaaaaaaaaa-1575425238.png

थाहा टाइम्स

thahatimes@gmail.com

यो नेपाली भाषाको अनलाइन पत्रिका हो । हामी तपाईमाझ खासगरी मकवानपुरकाे थाहा नगरपालिका र सँगसँगै तपाईंलाई काम लाग्ने देश-विदेशका समाचार, भिडियो, अडियो र विचार प्रकाशन गर्छौं । सुझाव, समाचार र विज्ञापनका लागि सम्पर्क : ९८५५०७८९१०(सम्पादक)







Makai-bali-prabardhan-1706086965.jpg
bali-bima-ko-suchana-1701933793.jpg
1000043372-1706361050.jpg