तनहुँ जिल्ला रिस्ती गाविस वडा नम्बर ३ मा घर भएकी सर्वदा अधिकारी पेशाले नर्स हुन् । अधिकारी कान्ति बाल अस्पताल काठमाण्डौंमा सेवारत् छिन् । हिन्दु नेपालीहरुको दोस्रो महान पर्व तिहारको लक्ष्मी पुजाको रात उनी र उनका साथीहरुको रात्रीकालिन सेवा छन् । उनी परिवारकी कान्छी चेली हुन् नर्स अधिकारी भन्दा माथि एउटी दिदी र एक दाइ छन् ।
नेपाल परम्परा र संस्कृतिको विविधतायुक्त देश । हरेक चाडपर्वको आ–आफ्नै विशेषता हुन्छन् । तिहारमा दाजुबहिनी वा दिदीभाइलाई भेट गराउने पर्वको रुपमा पनि लिइन्छ । नर्स अधिकारी १४ कात्तिकको रात्री कालिन सेवामा खटिरहँदा आफ्नो गाउँले प्रवेश सम्झिदै भन्छिन्–‘पहिला–पहिला तिहार र दीपावली आएपछि गाउँघरमा कटुस बटुल्न वन जंगल चाहार्न पुग्थ्यौं, सेल पकाउन ढिकीमा चामल कुटिन्थ्यो, मेवा र मुलाको जिब्रैमा झुण्डिने स्वादमा अचार बनाइन्थ्यो ।’ उनले थपिन–‘रोटी पोल्ने दाउरा ठीक्क पारिन्थ्यो ।’ आँगनमा ढकमक्क भएका सयपत्री र मखमलीले तिहार आएको जानकारी गराएको महशुस हुने नर्स अधिकारी सुनाउँछिन् । गाउँमा शहरमा जस्तो बिजुली बत्ती बालेर लक्ष्मी पुजा नहुने बताउँदै बारीमा लहलह भएका केराको सुत्लाको दीपावलीको दिन बार्दलीदेखि तलासम्म दियो बाल्ने दियो बन्थे, घरै झिलिमिली हुन्थे । उनले बाल्यकालमा देउसीभैलो खेल्न दाई दिदीको पछि लागेर दगुर्र्नेे गरेको लक्ष्मी पुजाको साँझमा अस्पतालमै बसेर सम्झिइन् ।
गाउँघर, आफन्त अनि साथीभाइहरु घरघरमा दीपावलीमा व्यस्थ भइरहँदा नर्स अधिकारी यस वर्षको लक्ष्मी पुजाको रात कान्ती बाल अस्पतालमै सेवारत् छिन् । उनीसंगै रात्री सेवामा खटिएका अरु नर्स तथा स्वास्थ्यकर्मीहरु हात्तेमालो गर्दै व्यथाले च्यापेर उपचारका लागि अस्पताल पुगेकालाई मल्हम् लगाउँदै छन्, उपचार गर्दैछन् । घर परिवारलाई छोडेर सेवा समर्पित छन् । विरामीको स्याहार औषधि उपचार संगसंगै चाडपर्वको रौनकलाई भने नर्स अधिकारीको टिमले भूल्नै सकेनन् । उनीहरुले पनि लक्ष्मी पुजाको रात नपर्दै फुल अक्षता जोरजम्मा गरे । लक्ष्मीको फोटो ल्याए, धुप नैवेद्य तयार गरी अस्पतालकै डाक्टरलाई फुर्सद हुँदा बस्ने कोठाको एउटा कुनामा लक्ष्मी पुजा गरे । अस्पतालमै भए पनि पुजाआजा गर्दा मन आनन्दित हुने अधिकारीले बताइन् । यसरी पुजा गर्दा रमाइलोको साथै घरैमा जस्तो महशुस भएको उनले सुनाइन् । उनले भनिन्–‘हामीले अस्पतालमै भए पनि लक्ष्मी पुजा मनायौं, अब लक्ष्मीले सबैको घरघरमा बास बस्न कन्जुस नगरुन् सबैलाई दीपावलीको शुभकामना ।’
(कान्ति बाल अस्पतालमा कार्यरत् नर्स सर्वदा अधिकारीसंग कुराकानीमा आधारित)
यो नेपाली भाषाको अनलाइन पत्रिका हो । हामी तपाईमाझ खासगरी मकवानपुरकाे थाहा नगरपालिका र सँगसँगै तपाईंलाई काम लाग्ने देश-विदेशका समाचार, भिडियो, अडियो र विचार प्रकाशन गर्छौं । सुझाव, समाचार र विज्ञापनका लागि सम्पर्क : ९८५५०७८९१०(सम्पादक)
