प्रहरीले लागुऔषध गाँजा र अफिमसहित ३० साउनमा भिमफेदी गाउँपालिकाका २ जनालाई पक्राउ गरेको छ । प्रहरीले गाँजाको कारोबार हुँदैछ भन्ने गोप्य सूचनाका आधारमा उनीहरुलाई भिमफेदी गाउँपालिका वडा नम्बर ९ काँसघारीबाट पक्राउ गरेको हो। पक्राउ पर्नेहरुमा भिमफेदी गाउँपालिकाको वडा नम्बर ९ मा बस्ने २९ वर्षीय खड्गबहादुर मोक्तान र सोही ठाउँमा बस्ने २८ वर्षीय सुदिप लामा रहेका छन् ।
जिल्ला प्रहरी कार्यालय मकवानपुर तथा प्रहरी चौकी भैसेबाट खटिएको सयुक्त चेकिङ टोलीले काँसघारीस्थित सडकमा नामटारबाट हेटौडा तर्फ आउँदै गरेको ना।१६ प।६५५२ नम्बरको मोटरसाईकल जाँच गर्दा लागुऔषधसहित उनीहरुलाई पक्राउ गरिएको हो । पक्राउ परेका मोक्तानले बोकेको झोलाबाट अबैध लागूऔषध गाँजा ८ किलो ३ सय ग्राम र उनले नै बोकेको अर्को झोलाबाट ७ किलो १२० ग्राम गाँजा बरामद भएको थियो ।
त्यस्तै सुदिपको साथबाट गाँजा ७ किलो १ सय ग्राम तथा पहेँलो रङको प्लाष्टिकको डिब्बा भित्र लुकाई छिपाई ल्याएको लागुऔषध अफिम १ किलो २ सय ग्राम फेला परेको थियो । दुबै जनाको साथबाट जम्मा गरी २२ केजी ५ सय २० ग्राम गाँजा र १ केजी २ सय ग्राम अफिम बरामद भएको छ ।
पक्राउ परेकालाई मोटरसाईकल सहित लागुऔषध नियन्त्रण ऐन २०३३ बमोजिम थप अनुसन्धानको लागि सम्मानित जिल्ला अदालत समक्ष म्याद थपको निम्ती पठाउने तयारी भैरहेको जिल्ला प्रहरी कार्यालय मकवानपुरले जनाएको छ ।
