सडकमा खाल्डाखुल्डी परेर जोखिम भएको भन्दै एमालेका नेताहरुले ज्ञापनपत्र बुझाए लगत्तै नगरपालिकाले उक्त समस्या समाधानका लागि तदारुकता देखाएको छ । नगरपालिकाले आफैसँग भएको एक्साभेटर, ट्रिपर र
औजारहरुको प्रयोग गरी हाल देखिएको सडक समस्या समाधानका लागि कार्य शुरु गरेको छ । सो कार्यका लागि छुट्टै चालक नै नियुक्त गरेर काम शुरु गरिएको नगरपालिका श्रोतले बताएको छ ।
बिहीबार थाहा–२ स्थित इन्द्रायणी मोटरबाटो सुधारका लागि उपमेयर खड्ग गोपाली आफै ट्रिपर लिएर पुगेका थिए । पुलचोकको त्रिभुवन राजपथ छेउबाटै काम शुरु गरिएको उनले बताए ।
उपमेयर गोपालीका अनुसार वडाहरुबाट आएको मागको आधारमा नगरपालिकाको मेशिन र ट्रिपरहरुको प्रयोग गरिनेछ । हाललाई वडाहरुका मुख्य सडक र धेरै मानिसहरुलाई प्रभाव पार्ने सडकमा देखिएको समस्या समाधान गर्नेगरी काम शुरु भएको उनले बताए । मुख्यतः अहिले खाल्डाखुल्डी पुर्ने र सडक सम्याउने काम भएको छ ।
ज्ञापन पत्र बुझाएपछि पनि आफूहरुले लगातार ‘फलोअप’ गरेको र समस्या समाधानको विषयमा नगरपालिकाले विशेष चासो देखाएको एमाले नगरकमिटीका निवर्तमान अध्यक्ष अच्युतमप्रसाद ढकालले बताए ।
