सञ्चारकर्मी अनिता विन्दु मास्क किन्न मेडिकल गएकी थिइन् । पसलमा लाइन थियो । त्यति नै बेला एक बृद्धा आइपुगिन् । उनले पसलेसँग सेनिटाइजर मागिन् । र, भनिन्, ‘मोबाइलमा कुइँनाले मुख छोप्ने, सेनिटाइजर लगाउने भनेको भन्यै छ, त्यही भएर लिन आएको ।’
ती बृद्धाले यसो भन्दा अनिता खुसीले गदगद् भइन् । किन कि मोबाइलमा यसो भन्ने उनै थिइन् । उनले बुझिन् आफ्नो आवाजको प्रभाव । एउटा सन्देशले आम मानिसमा छरेको सचेतना । भन्छिन्, ‘६५ वर्षीया ती बृद्धाले भनेको सुनेपछि मलाई राम्रो काम गरेछु भन्ने लाग्यो । कुनै काम गरेपछि आत्मसन्तुष्टि सबैभन्दा महत्वपूर्ण हो भनिन्छ नि । मलाई त्यही सन्तुष्टि प्राप्त भयो ।’
कोरोना भाइरस (कोभिड–१९) को संक्रमण विश्वब्यापीरुपमा फैलिरहेका बेला टेलिकमले आफ्ना ग्राहकलाई सचेत बनाउन यस्तो सूचना प्रवाह गरेको हो । आजकाल तपाईंले नेपाल टेलिकम मोबाइल वा फोनमा नम्बर डायल गर्नेबित्तिकै एउटा धूनसँगै सुनिन्छ– ‘कोभिड–१९ का मुख्य लक्षणहरू ज्वरो आउने, थकाइ लाग्ने र सुख्खा खोकी आदि हुन् । यसबाट आफू र अरूलाई सुरक्षित राख्न गुणस्तरीय सेनिटाइजर वा साबुन पानीले नियमित हात धुनुहोस् ।’
सन्देश अझै अघि बढ्छ– ‘खोक्दा, हाछ्यूँ गर्दा मुख र नाकलाई कुहिनो वा टिस्यूले राम्ररी छोप्नुहोस् । भीडभाडमा जाँदा मास्क प्रयोग गर्ने तथा खोकिरहेको व्यक्तिबाट कम्तीमा ३ फिट पर बस्नुहोला । यदि तपाईंमा यस्तो लक्षण देखिएमा स्थानीय स्वास्थ्य संस्था वा अधिकारीले दिएको सल्लाह–सुझावलाई पालना गर्नुहोस् ।’
०००
गत साता नेपाल टेलिकमबाट फोन आयो, कोरानासम्बन्धी सन्देश रेकर्ड गर्नका लागि प्रस्तावसहित । उनले प्रस्तावलाई सहर्ष स्वीकार गरिन् । गत बुुधबार साँझ नेपाल टेलिभिजनको कार्यालयमा सन्देश रेकर्ड भयो । एउटा अलिक छिटो बोलेको र एउटा ढिला बालेको दुई सन्देश उनले १० मिनेटभित्र रेकर्ड गराइन् । एउटा कागजको टुक्रमा लेखिएको शब्दहरू पढ्न उनलाई कुनै तयारी गर्नुपरेन । नेपाल टेलिभिजनकी समाचार सम्पादक अनिता बोल्नमा अभ्यस्त भइसकेकी थिइन् नै ।
रेकर्डिङ भएको २४ घन्टा नबित्दै टेलिकमका ग्राहकको ‘सिआरबिटी’ मा सो सन्देश बज्न थाल्यो । अनिता भन्छिन्, ‘यस्ता सन्देशहरूमा यसअघि पनि बोलिराख्थेँ । त्यसैले कुनै अभ्यासविना नै एकैछिनमा यो सन्देश रेकर्डिङ ग¥यौं ।’ यसअघि सयौं सूचनाहरू रेकर्डिङ गराएकी अनितालाई यो सन्देश रेकर्ड गर्दा पनि समान्य लाग्नु स्वाभाविक थियो ।
बिहीबार दिउँसो उनलाई एकाएक बधाईको ओइरो आउन थाल्यो । फोन, मेसेज र फेसबुकमार्फत । ‘कस्तो गज्जबको सूचना प्रवाह गर्नुभएको रहेछ, कति मीठो बोल्नुभएको रहेछ, निकै राम्रो काम गर्नुभयो भन्दै बधाई आउन थालेपछि भने केही नौलो लाग्यो’ अनिता अनुभव सुनाइन् । जुन अनुभव उनले यसअघि गर्न पाएकी थिइनन् । अर्थात, सामान्य लागेको कामले उनलाई असामान्य अनुभव दिलायो ।
तारन्तार बधाई आउन थाले पनि उनले आफ्नै आवाज भने सुन्न पाएकी थिइनन् । त्यसपछि उनले आफ्नै बहिनीको मोबाइलमा फोन गरिन् । ‘सिआरबिटी’ मा आफ्नै आवाज सुनियो । खुसी हुँदै बहिनीलाई उनले यसबारे भनिन् । बहिनीले यति भन्नासाथ फोन काटिन् । दिदीको आवाज सुन्न अनितालाई नै फोन गरिन् । ‘कति राम्रो बोलेको’ बहिनीको प्रतिक्रियाले उनलाई झन् खुशी बनायो ।
करोडभन्दा धेरै मानिससामू आफ्नो आवाज पुग्नुको खुशी त छँदैछ, सिआरबिटी सुनेपछि सामाजिक सञ्जालका साथै साथीसंगी र अपरिचितहरू प्रतिक्रियाले उनी उत्साहित छिन् । मिडियाले दिएको स्थानले उनलाई विशेष अनुभव भएको छ । ‘अरू बेलाको रेकर्डिङमा पनि साथी–भाइले राम्रो छ भन्नुहुन्थ्यो तर यतिबेला त देशले नै भनिरहेको छ । मेरा लागि योभन्दा धेरै खुसीको कुरा अरू के नै हुन सक्छ र !’ अनिता भन्छिन् ।
टेलिकममा मात्र नभएर अन्य कार्यक्रमहरूमा पनि आफूले कोरोनासम्बन्धी सूचना तथा सन्देशहरू प्रवाह गरेको अनिता बताउँछिन् । यसलाई उनले एउटा सञ्चारकर्मीको भूमिका र दायित्वका रूपमा लिएकी छन् । र, उनको आग्रह छ– संक्रमणबाट बच्न सबैले आफ्नो तर्फबाट भूमिका र जिम्मेवारी निर्वाह गर्नु आवश्यक छ । त्यो आफ्नै लागि होस् या अरू कसैका लागि ।
कोरोना भाइरस संक्रमणको उच्च जोखिममा नेपाल पनि छ । यस्तो अवस्थामा जनतामा सचेतना फैलाउने काममा आफूलाई पनि सहभागी बनाउन पाउँदा अनिता खुसी छिन् । टेलिकममा छोटो समयमा दिइएको यो सन्देश केवल जनतामा जागरुकता जगाउनका लागि भएको उनको भनाइ छ । भन्छिन्, ‘यो त एउटा सानो सन्देश थियो । कोरोना संक्रमणबाट बच्न हामीले गर्नुपर्ने काम धेरै छ । विभिन्न मिडियामा पनि आइरहेको छ । सरकारले पनि भनिरहेको छ । सबैभन्दा पहिला हामी आफैँ सचेत भयौँ भने यो संक्रमणबाट बच्न सक्छौँ ।’ डाक्टर, स्वास्थ्यकर्मी र विज्ञका सुझाव अपनाउन उनको सबैमा आग्रह छ ।
-साप्ताहिकबाट
