चित्लाङमा भइरहेको थाहा नगरपालिका वडा स्तरीय फुटबल प्रतियोगिताको उपाधिको लागि वडा नम्बर १ र ३ भिड्ने भएका छन् । फाइनल खेल १३ माघमा हुनेछ ।
खेलकुद बिकास समिति थाहा ९ चितलाङका अध्यक्ष अमर सिंह ठकुरीका अनुसार १२ माघमा वडा नम्बर ३ र ७ बिच भएको सेमिफाइनल चरणको पहिलो खेलमा वडा नम्बर ३ बिजयी भएको छ ।
निर्धारित समयमा गोल रहित बराबरी भएपछि ट्राईबेकरमा ४-३ गोल अन्तरले वडा नम्बर ३ फाइनल प्रबेश गरेको हो । यस खेलको म्यान अफ द म्याच वडा नम्बर ३ का गोलकिपर देबबहादुर पाख्रिन घाेषित भए ।
त्यस्तै सेमिफाइनल चरणको दोस्रो खेलमा वडा नम्बर १ बिजयी भएको छ । वडा नम्बर १ र ११ बिच भएको खेलमा निर्धारित समयमा गोलरहित बराबरी भएपछि ट्राईबेकरमा ७-६ गोल अन्तरले वडा नम्बर १ फाइनल प्रवेश गरेको हो । यस खेलको म्यान अफ द म्याच वडा नम्बर १ का गोलकिपर प्रचण्ड गोपाली भएका थिए ।
थाहा नगर खेलकुद विकास समितिको आयोजना तथा वडा नम्बर ९ खेलकुद विकास समितिको व्यवस्थापनमा थाहा नगरपालिका वडास्तरीय फुटबल प्रतियोगिता सञ्चालन भएकाे हाे ।
प्रतियोगितामा बिजेता टिमले नगद १ लाख र उपबिजेता टिमले नगद ५० हजार रुपैयाँसहित शिल्ड, मेडल र प्रमाणपत्र प्राप्त गर्नेछन् भने विधागत उत्कृष्ट खेलाडीहरुलाई पनि ट्रफी र पुरस्कारको व्यवस्था गरिएकाे आयोजकले जनाएको छ ।
यो नेपाली भाषाको अनलाइन पत्रिका हो । हामी तपाईमाझ खासगरी मकवानपुरकाे थाहा नगरपालिका र सँगसँगै तपाईंलाई काम लाग्ने देश-विदेशका समाचार, भिडियो, अडियो र विचार प्रकाशन गर्छौं । सुझाव, समाचार र विज्ञापनका लागि सम्पर्क : ९८५५०७८९१०(सम्पादक)
